In maaner Eingschafd als Zivi.
Dexde zum Dehma Budzn.
Deil 4: Goude Roodschlääch
Mied zwaa Krüggn und mied zwaa Auhng, dey fasd scho derloschn woarn, hodds mä di Wohnung aafgmachd. Noch maaner kurzn Vurschdellung is ins Wohnzimmer zu anner Vitrinä gwaggld. Do sinn Pogahle dringschdandn: Ofd hodds änn erschdn, manchmol änn zwaadn und seldn änn driddn Bladz gmachd. Alle hamm si ums Schifoahrn drehd. Sogoar bamm Riesnslalom in Kidzbühl hodd die scho miedgmischd.
»Fräihers, do hobbi nu könnd. Edz konni ned amol mehr gscheid laafm.«
Wos wyllsd do sohng? Also hobbi änn Besn gnommä und aff ihrm Balkon mibm Kehrn ohgfangd. »Fräihers«, hodds widder fesdgschdelld, derwall iich di Herbsdblädder zu amm klann Haufm und dann aaf mei Schaufl naufhobb, »simmä mied Bredder roogfohrn. Aus Hulz woarn die und mied ohne Kandn.«
Winder woars, eihngli nu rechd warm für di Joahreszeid und iich hobb mi gfraid aff des Wochenend mied maane Fraindlers in Südirol.
»Iich an ihrer Schdelln deed ned foahrn«, sachds und des klingd wäi ä Roodschlooch vo maane Eldern. »Do doun sä si doch blouß ärchern. Haid foahrns ja in ihrer Freizeid so schnell wäi mir ba di besdn Rennä!«
Iich hobb än Dreeg und di aldn Blädder in Abfall gschmissn und ned vyll gsachd. Sie hodd si trolld und dä Fernseher is ziemli laud worn. Dann hobbi di Herdbladdn gsaiberd und ihre Schränk ausgwischd, än Mull runderdrohng und abgschdaubd. Irchendwann binni zu ihr ins Wohnzimmer.
Nochdem mir di Formulare ausgfülld hamm, und iich eighnli scho am Schbrung woar, sachds genauso barsch, wäis mä vorher di Meinung geichd hodd. »Edz wardns amol. Sie griehng scho nu wos vo mir!«
Iich hobb mi gwunderd und widder hieghoggd. Im Fernseher is ä Delenovela gloffn und mä hodd Gsichder gsehng, di schäi, obber ohne Ausdrugg woarn. Ganger is widder amol darum, dass kanner sachd, wossä werkli denkd.
Irchendwann kummds zurügg und drüggd mir an Zehner in maane Händ. »Doo, kaaf dä ä Baggung Bflasder, wenns dä scho von anner aldn Fraa nix sohng lässd: Diich brellds ja eh!«
Iich hädds umarmä könner in dem Momend, aa wenns ned ums Vereggn zougehm hädd, dass furchdboar gern mied uns affm Berch nauf wär – mied di schnellsdn Schi, die mä haier kriehng koo!